اس علاقے میں دل ستاں ہے کون

اس علاقے میں دل ستاں ہے کون
تو نہیں ہے، تو پھر یہاں ہے کون 

کس کی لو سے دمک رہا ہوں میں 
تو نہیں ہے، تو میری جاں! ہے کون

آپ ہر دل میں جا دھڑکتا ہے
حرفِ سادہ کا ترجماں ہے کون

بات کو چاہیے لبِ اظہار
راز کیا چیز، راز داں ہے کون

خواب، یا خواب دیکھنے والا
آپ اپنے میں، اک گماں ہے کون

عافیت اپنی ہو جہاں مخدوش
پوچھئے کیا کہ بے اماں ہے کون

اپنی آغوش میں لیے مجھ کو
یہ زمیں زیرِ آسماں ہے کون 

میں جو ناراض ہوں، تو خود سے ہوں 
زندگی! تجھ سے سرگراں ہے کون

درد کی گرد بیٹھتی ہی نہیں 
دیکھئے کیا، یہ کارواں ہے کون

کہہ دیا تھا، بُجھا نہ دل کا چراغ
دیکھ لے اب دھواں دھواں ہے کون

طارق بٹ